Şəhid qəhrəman kəşfiyyatçı

Vətən müharibəsində canı və qanı ilə tarix yazmış qəhrəmanlarımızı tanıtdırmağa davam edirik. Sıradakı qəhrəmanımız kəşfiyyatçı kimi döyüşlərə qatılan, müharibənin son gününə qədər döyüşən Fəqan Zalovdur. O, ötən il noyabrın 9-da Xocavənd uğrunda gedən döyüşlərdə qəhrəmancasına şəhid olub. Ölümündən sonra 6 medalla təltif edilib.
44 günlük vətən müharibəsində parlaq qələbənin əldə edilməsində onun da payı var. İşğal altındakı torpaqlarımızın azad edilməsi uğrunda canını fəda edərək şəhadətə ucaldı. Söhbət əslən Füzuli rayonundan olan, 1997-ci ildə Sabirabad rayonunun Qalağayın çadır şəhərciyində anadan olmuş Fəqan Zalovdan gedir.
Şəhid kəşfiyyatçımız Cəbrayıl rayonunun Soltanlı, Maralyan, Əmirvarlı, Şükürbəyli kəndlərinin və bir çox yüksəkliklərin düşməndən azad olunmasında böyük şücaət gösdərib.