İdman

Aqil Cəfərli məktəbimizin fəxridir
Şito-ryu karate-do idman növü üzrə Rumıniyanın Oradeo şəhərində 10-11 yaş qrupunda dünya birinciliyi və Avropa çemponatı keçirilmişdir. Aqil Arzu oğlu Cəfərli həmin yarışda iştirak etmişdir. Aqil Cəfərli (47 kq) dünya çempionatında III yerə layiq görülmüş və Avropa birinciliyində isə fəxri kürsünün ən yüksək pilləsinə qalxaraq Avropa çempionu olmuşdur.
Aqil bizim məktəbin V d sinif şagirdidir. Bu münasibətlə məktəbin direktoru Elsevər Kərimov və sinif rəhbəri Dilşad Hüseynova Aqili təbrik etmişlər. Mən də bu təbriklərə qoşuluraq məktəbimizin fəxri Aqil Cəfərliyə ən xoş arzularımı bildirirəm.

Şalı HƏSƏNOV,
Nizami Gəncəvi adına Sabirabad şəhər tam orta
məktəbinin fiziki tərbiyə
müəllimi, “Azərbaycan
Respublikasının Fəxri Bədən Tərbiyəsi və İdman İşçisi”.


“Elvin” İdman Klubunun güləşçiləri qələbə qazanmışlar
Azərbaycan Respublikası Gənclər və İdman Nazirliyi Füzuli rayon Gənclər və İdman İdarəsinin təşkilatçılığı ilə “28 May Respublika Günü”nə həsr olunmuş kiçik yeniyetmələr arasında sərbəst güləş üzrə açıq rayon birinciliyi keçirilmişdir. Füzuli rayonunda təşkil olunan yarışda Sabirabad, Cəlilabad, Ağcabədi, İmişli, Xocavənd, Astara, Füzuli və digər rayonların idmançıları iştirak etmişlər. Sabirabad rayonunu “Elvin” İdman Klubundan 6 güləşçi təmsil etmişdir.
“Elvin” İdman Klubunun rəhbəri Arif Cəfərov bildirmişdir ki, güləşçilərimiz yarışda qələbə qazanmışlar. Mərdan Musazadə və Seyidhəsən Həmidli bütün rəqiblərinə qalib gələrək fəxri kürsünün ən yüksək-birinci pilləsinə qalxmışlar. Məhəbbət Əkbərli II yeri, Ayaz Zeynalov, İsmayıl Fərzəliyev, Emil İbrahimov isə III yeri tutmuşlar. Güləşçilər medal və diplomlarla təltif edilmişlər.

“Muğanın səsi”