• 12:37 – Türkiyəli Olimpiya və dünya çempionu Sabirabada gələcək 
  • 14:22 – İlham Əliyev xanımı ilə İslamiadanın açılışında iştirak etdi 
  • 14:04 – Sabirabad Rayon İcra Hakimiyyətinin başçısı Siraqəddin Cabbarov növbəti səyyar görüş - qəbul keçirib 
  • 13:30 – Sabirabadda əkin sahələrinin suvarma suyu ilə təminatı yaxşılaşdırılır 
  • 15:22 – Prezident İlham Əliyev Türkiyəyə işgüzar səfərə gedib 

Kənd Təsərrüfatı Nazirliyinin məlumatlandırma sessiyası keçirilib

  • 10.12.2021, 21:43, Baxış sayı:
  • 540
Kənd Təsərrüfatı Nazirliyinin məlumatlandırma sessiyası keçirilib
Torpaq analizləri fermerlərə gübrələrdən düzgün və səmərəli istifadə imkanı verir

Kənd Təsərrüfatı Nazirliyi payızlıq əkinlərin Elektron Kənd Təsərrüfatı İnformasiya Sistemində bəyan edilməsi ilə əlaqədar bölgələrdə məlumatlandırma sessiyalarını davam etdirir. Sabirabad rayonunda keçirilən tədbirdə aqrar sektora ayrılan subsidiyaların verilməsində yeniliklər, Aqrar Subsidiya Şurasının qərarları, payızlıq əkinlərin Elektron Kənd Təsərrüfatı İnformasiya Sistemində (EKTİS) bəyan edilməsinə dair cari vəziyyət barədə müzakirələr aparılıb.
Görüşdə çıxış edən Kənd Təsərrüfatı Nazirliyinin Aparat rəhbəri Rəfail Quliyev bildirib ki, subsidiyaların verilməsində tətbiq olunan mühüm yeniliklərdən biri ümumi torpaq sahəsi 5 hektardan çox olan fermerlərin hər 5 hektara 1 torpaq analizi verməsi tələbidir. Bu kateqoriyaya daxil torpaq mülkiyyətçiləri dekabrın 30-dək əkin bəyanları ilə paralel olaraq torpaq analizlərinin nəticələrini də EKTİS-ə daxil etməlidir. Torpaqların analizi məhsuldar torpaqların münbitliyinin qorunub saxlanılmasını, eyni zamanda mineral və üzvi gübrələrdən düzgün və səmərəli istifadəni təmin edəcək. Eyni zamanda laboratoriya məlumatlarının nəticələrindən istifadə etməklə torpaqların münbitlik göstəricilərinin monitorinqini həyata keçirmək mümkün olacaq. Fermerlər öz sahələrindən torpaq analizi verməklə torpağın qida elementlərinə ehtiyacını müəyyənləşdirəcək, yanlış gübrə növü istifadə etməyəcək, gübrə normasını müəyyən edə biləcək. Bu isə torpaqların uzun müddətli və davamlı istifadəsinə imkan yaradacaq.
Fermerlər öz torpaqlarından analiz vermək üçün Sabirabad rayonunda fəaliyyət göstərən aqrokimya laboratoriyasına müraciət edə bilərlər. Ən müasir avadanlıqlarla təchiz olunmuş laboratoriya Dövlət Aqrar İnkişaf Mərkəzlərinin binasında yerləşir. Analiz paketinə pH, elektrik keçiricilik, ümumi azot, mənimsənilən fosfor və mübadiləvi kalium göstəriciləri daxildir.
Görüş zamanı payızlıq əkinlərin EKTİS-də qeyd olunan müddətdə bəyan edilməsinin zəruriliyi geniş müzakirə olunub. Bildirilib ki, payızlıq əkinlərin bəyan müddəti dekabrın 30-da başa çatır. Bu tarixə qədər EKTİS-də öz şəxsi kabinetini aktivləşdirməyən və əkinlərini bəyan etməyən fermerlər 2022-ci ildə əkin subsidiyası ala bilməyəcəklər. Əkinlərin bəyan edilməsi üçün fermerlərə 4 ay vaxt verilib və torpaq mülkiyyətçiləri son tarixi gözləmədən qısa müddətdə öz əkinlərini EKTİS-də bəyan etməklə müvafiq subsidiyanı ilin ilk aylarında almaq imkanı qazanırlar.
Fermerlərə növbəti ildən həm arpa, həm buğda əkininə görə eyni həcmdə - 210 manat subsidiya ödəniləcəyi, pambıq, şəkər çuğunduru və tütün üzrə əkin subsidiyasının tam şəkildə məhsul subsidiyası ilə əvəzlənməsi və digər yeniliklər barədə məlumat verilib, onların sualları ətraflı cavablandırılıb, səsləndirilən təkliflər qeydiyyata alınıb.
Kənd Təsərrüfatı Nazirliyinin nümayəndə heyətinin payızlıq əkinlərin bəyan edilməsi ilə bağlı növbəti məlumatlandırma sessiyası Masallı, Cəlilabad və Biləsuvar rayonlarında keçiriləcək. Buna qədər nazirlik tərəfindən 11 rayonda analoji tədbirlər keçirilib. Tədbirlər planına əsasən, məlumatlandırma sessiyalarının payızlıq əkinlərin aparıldığı 50-dən artıq rayonda keçirilməsi nəzərdə tutulur.
“Muğanın səsi”
Maqazin
InvestAZ
Sosial Media
  • Facebook
  • Twitter