İnsanı dəli edən narkotik “Patı”
- Həkimlər çarəsizdir
Narkomaniya dövrümüzün ən böyük bəlalarından biridir.
Xalq arasında “patı”, “şüşə” kimi tanınan “Metamfetamin” son dövrlər ən çox yayılan narkotik vasitələrdən biridir.
Bu maddəni qəbul etdikdə bədəndə təzyiq yüksəlir, bədən istiliyi artır, göz bəbəkləri böyüyür. Onlarda zamanla şiddətə, intihara meyillilik və digər qəribə hərəkətlər müşahidə olunur.
Davamlı istifadəsi zamanı böyrəkləri sıradan çıxardır, beyinə böyük ölçüdə zərər vurur. Beynin funksiyası pozulur və istifadəçi bir çox hallarda 2-3 gün yatmır, yeməkdən imtina edir, özünü enerjik hiss edir. Ancaq davamlı istifadə zamanı metamfetamin insanı depressiyaya salır və bu da intihara səbəb olur.
Metamfetamin eroindən belə daha tez asılılıq yaradır və ondan xilas olmaq çox çətindir. Davamlı istifadə zamanı çəki azalır, “Met ağzı” deyilən diş çürükləri meydana gəlir.
Təəssüf ki, son dövrlər bu maddədən istifadə yaşı 16-lara qədər düşüb.
“Muğanın səsi”nin
analitik qrupu
