Prezidentdən göstəriş: Şəhidlərin nəşi köçürüldü

Azərbaycan Prezidenti, Ali Baş Komandan İlham Əliyevin göstərişi ilə övladları Qaradağ ərazisində dəfn olunmuş şəhid ailələrinin arzusu yerinə yetirilib.
Axar.az xəbər verir ki, Qaradağ rayonu ərazisində dəfn olunmuş şəhidlərimizin nəşi bu gün Yasamaldakı Şəhidlər Xiyabanına köçürülüb.
Qeyd edək ki, sözügedən ərazidə dəfn edilən şəhidlərin doğmaları əraziyə qrunt sularının yığıldığını bildirərək, məzarların köçürülməsini istəmişdilər. Lakin beynəlxalq hüquq üzrə professor, tanınmış ekspert Fərhad Mehdiyev ərazidə bir neçə şahidin iştirakı ilə araşdırma aparmış və şəhidlərin dəfni üçün ayrılan yerin heç də qəbiristanlığın aşağı hissəsi olmadığı, əksinə, ikinci sırada yerləşdiyi, orada qrunt sularının yığılmadığını foto və video faktlarla təqdim etmiş, amma ərazinin abadlaşdırılmasının gecikməsindən narahatlığını ifadə etmişdi.
Bu gün qəbirlər açılarkən də orda heç bir qrunt suyunun sızmadığı müəyyən edilib.
Buna baxmayaraq, şəhid ailələrinin arzusu yerinə yetirilib və şəhid məzarları köçürülüb.
Ruhları şad olsun!